Nikita Makarenko, ELEKTROOKO hám Jeńisbek Piyazovtıń «Erteń» atlı klipinde Aral teńizi qayta toladı

ELEKTROOKO atlı Ózbekstan toparı «Erteń» atamasındaǵı klipinde Araldıń qaytıp keliwi haqqında mámleket tariyxındaǵı eń ayrıqsha muzıkalı videosın usınadı.

Videonı ELEKTROOKO Youtube kanalında ózbekshe-orıssha jáne qaraqalpaqsha-orıssha versiyalarında kóriwińizge boladı. Sonday-aq, videonı jergilikli telekanallardıń rotaciyalarında kóre alasız. Sonıń ishinde Uzreport TV da hápte dawamında hár saatta berip barıladı.

Bul joybar millionlaǵan adamlardıń Aral teńiziniń qaytıwı haqqındaǵı úlken ármanınan kelip shıqtı. Joybarımız bul ármannıń kórkemlik emocionallıq vizualizaciyası.

Scenariy avtorı, rejissyorı hám prodyuseri Ózbekstan jurnalisti Nikita Makarenko bolıp, ol bunnan aldın ELEKTROOKO toparınıń "1984" atlı klipin túsirgen edi. Joybar Ózbekstan milliy kinokomissiya menen birgelikte ámelge asırıldı.

«Biz bul joybar ushın bar kúshlerimiz benen resurslarımızdı iske saldıq, biziń niyetimiz – jasalma emes, haqıyqıy kórkem-óner dóretpesin jaratıw, sol arqalı Aral boyı mashqalasına, regionımızdaǵı ıqlımnıń ózgeriwi jáne suwdı saqlap qalıwdıń áhmiyetine dıqqat qaratıw. Biz ájayıp Qaraqalpaqstanǵa, onıń adamları menen mádeniyatına qızıǵıwshılıq oyatıp, dúńya ellerinen kóplegen insanlar bul jerge keliwdi qálewine úmit etemiz», - deydi Nikita Makarenko.

Bul muzıkalı video pútkil Ózbekstan xalqına ǵárezsizliktiń 30 jıllıǵına ózgeshe sawǵa bolıp, 2021-jıldı Aral boyın «ekologiyalıq innovaciya hám texnologiyalar aymaǵı» etip járiyalaǵan BMSh niń Bas Assambleyasınıń rezolyuciyasın qollap-quwatlaydı.

Ashot Danielyannıń qosıǵın ózbek hám qaraqalpaq tillerinde Ózbekstan hám Qaraqalpaqstan xalıq artisti Jeńisbek Piyazov, sonday-aq ELEKTROOKO toparı jáne Ózbekstan mámleketlik simfoniyalıq orkestri atqardı. Simfoniyalıq versiyasınıń avtorı - belgili kompozitor Artem Kim.

Avtorlar ushın eń áhmiyetlisi Ózbekstannıń kosmopolitliligin kórsetiw maqsetinde bir neshe tildegi muzıkalı polifoniya jaratıw edi. Keleshekte batıs juldızlarınıń biriniń qatnasında bul kliptiń inglis tildegi versiyasın shıǵarıw rejelestirilmekte.

Videoda Qaraqalpaqstannıń jas hám professional aktyorları, sonday-aq Ózbekstanǵa xızmet kórsetken artist Seydulla Moldaxanov rollerdi atqardı.

300 den artıq adam klip ústinde jumıs alıp bardı hám tikkeley ózinde qatnastı. Avtorlar qaraqalpaq mádeniyatın úyreniwge itibar qaratıp, onı scenariyde tolıq jarıtıwǵa urındı.

Súwretke alıwǵa bir jıldan aslam waqıt tayarlıq kórildi. Videonı túsiriw 2021-jıldıń iyuń-iyul` aylarında Qaraqalpaqstannıń awır ıqlım sharayatlarında Ústirt platosı, Qubla-Ústirt posyolkasında jáne Moynaq qalasında ámelge asırıldı.

Klip jaratıwshıları sırt ellerden eń aldıńǵı súwretke alıw texnikaların alıp keldi, sonday-aq Bi-2, Eldjey hám Levan Goroziya menen birge islesken rossiyalı saxnalastırıwshı operator Dmitriy Volmerdi jumısqa tarttı.

Kliptiń vizual effektlerin Oxxxymirone, Manizha, Feduk, Skriptonit hám basqa da atqarıwshılardıń kliplerin túsiriwde qatnasqan, prodyuser Azamat Sayfullaev basshılıǵındaǵı Play Studio kompaniyası islep shıqtı.

Bul muzıkalı video Nikita Makarenko hám Ózbekstan milliy kinokomissiyasınıń «Aral ármanı» atlı keń kólemli joybarınıń baslaması bolıp esaplanadı.

Avtorlar hám sherikler usı atamadaǵı kommerciyalıq emes shólkemdi dúzip, onıń wazıypası – Aral boyı mashqalasın jáhán ǵalaba mádeniyatına alıp shıǵıw, sonday-aq regiondı mádeniy hám intellektual rawajlandırıwǵa kómeklesiw bolıp tabıladı.

Аlǵa qoyılǵan ilajlar ishine: Nókis qalasında kóp baǵdarlı úlken festival`, Igor` Savickiy atındaǵı Qaraqalpaq mámleketlik kórkem-óner muzeyinde «Suw yadnaması» kórgizbesi menen Amerika Qurama Shtatlarında qayırqomlıq balın ótkeriw, «Aral ármanı» mangasın basıp shıǵarıw hám basqa da joybarlar kiredi.

«Aral ármanı» missiyası menen Araldream.uz saytında tolıǵıraq tanısıwǵa boladı.

«Erteń» klipiniń jaratıwshıları bul ármannıń orınlanıwına járdemlesken bárshege:

Bas sherik Zamin fondına

Ózbekstan Respublikası Turizm hám sport ministrligine, Ózbekstan Respublikası Ekologiya hám qorshaǵan ortalıqtı qorǵaw mámleketlik komitetine, Qaraqalpaqstan Respublikası Jaslar agentligi, Joqarǵı Keńesi hám Ministrler Keńesine.

Sonday-aq, Aral boyı regionında Insan qáwipsizligi boyınsha BMSh niń Kóp sherikli trast fondına, BMSh niń Málimleme Byurosına, BMShRB na hám Shveycariya elshixanası janındaǵı Shveycariya birge islesiw byurosına óz minnetdarshılıǵın bildiredi.